Caput CXLVIILiber Psalmorum

1. 1Alleluja. Lauda, Jerusalem, Dominum ; lauda Deum tuum, Sion.
2. 2 Quoniam confortavit seras portarum tuarum ; benedixit filiis tuis in te.
3. 3 Qui posuit fines tuos pacem, et adipe frumenti satiat te.
4. 4 Qui emittit eloquium suum terræ : velociter currit sermo ejus.
5. 5 Qui dat nivem sicut lanam ; nebulam sicut cinerem spargit.
6. 6 Mittit crystallum suam sicut buccellas : ante faciem frigoris ejus quis sustinebit ?
7. 7 Emittet verbum suum, et liquefaciet ea ; flabit spiritus ejus, et fluent aquæ.
8. 8 Qui annuntiat verbum suum Jacob, justitias et judicia sua Israël.
9. 9 Non fecit taliter omni nationi, et judicia sua non manifestavit eis. Alleluja.